ललितपुर ः ललितपुर महानगरपालिकाले आपाङ्गता भएका व्यक्तिहरुलाई परिचयपत्र वितरण गर्न सुरु गरेको छ । ललितपुर महानगरपालिकामा आयोजित कार्यक्रममा मेयर चिरीबाबु महर्जनले  अपाङ्गता भएकालाई परिचयपत्र दिएर यसको सुरुवात गर्नु भएको हो । नेपाल सरकारले २०५६ सालदेखि आपाङ्गता भएका व्यक्तिहरुलाई अपाङ्गता परिचयपत्र वितरण गर्दै आएको थियोे । २०६० साल देखि यो कार्य प्रत्येक जिल्लाका महिला विकास कार्यालयहरुमार्फत गरिदै आएको थियो ।
परिचयपत्र वितरण कार्यक्रममा मन्तव्य राख्दै  मेयर चिरीबाबु महर्जनले आपाङ्गता भएका व्यक्तिहरुलाई महानगरले बार्षिक एकमुष्ठ पाँच हजार रुपैयाँ उपलब्ध गराउने बताउनुभयो । उहाँले अपाङ्गता भएका 
व्यक्तिहरुको समस्याप्रति ललितपुर महानगर अत्यन्तै संवेदनशील भएको स्पष्ट पार्नुभयो । उहाँले भन्नुभयो, ‘हामी आपाङ्गता भएका व्यक्तिहरुको लागि आवतजावतमा सहजता ल्याउन आपाङ्गता मैत्री ट्याक्सी भित्रयाउने तयारीमा छौं । ’ उहाँेले महनगर कार्यालयलाई आपाङ्गता मैत्री बनाउन लिफ्ट जडानको कार्य अन्तिम चरणमा पुगेको जानकारी भयो । उहाँले महानगरभित्र बन्ने सबै कार्यालयहरु आपाङ्गता मैत्री हुने बताउनुभयो । 
परिचयपत्र वितरण समन्वय समितिको संयोजक तथा उपमेयर गीता सत्यालले यो परिचयपत्र वितरण कार्यक्रमले महानगरभित्र रहेका  आपाङ्गता भएकाहरुको एकीन तथ्याङ्क प्राप्त हुने वताउनुभयो । उहाँले भन्नुभयो ्, ‘यो तथ्याङ्क प्राप्त भएपछि महानगरलाई आपाङ्गता मैत्री कार्यक्रम ल्याउन र योजना बनाउन मद्दत पुग्ने छ । ’ उपमेयर सत्यालले महानगर आपाङ्गता भएका व्यक्तिहरुको समस्याहरुप्रति गम्भीर र चिन्तनशील रहेको बताउनुभयो । 
देशमा संघीयता कार्यान्वयनसंगै अपाङ्गता परिचयपत्र वितरण गर्ने कार्यको जिम्मेवारी स्थानीय तहमा आएको हो । त्यही अनुरुप ललितपुर महानगरपालिकाले गएको पौषमा भएको तेस्रो नगरसभाबाट अपाङ्गता भएका व्यक्तिहरुलाई परिचयपत्र वितरण सम्बन्धि कार्यविधि जारी गरेको थियो । सोही कार्यविधि अनुरुप महानगरले अपाङ्गता परिचयपत्र वितरण सुभारम्भ गरेको हो । असार २५ गतेबाट सुरु भएको यो परिचय पत्र वितरण कार्य प्रत्येक हप्ताको विहिबार हुने ललितपुर महानगरपालिकाले जनाएको छ । 
आपाङ्गता भएका व्यक्तिहरुलाई प्रदान गरिने कार्डलाई रातो, निलो, पहेलो र सेतो गरी आपाङ्गताको स्तरका आधारमा चार प्रकारमा वर्गीकरण गरिएको छ । शारिरीक, बौद्धिक लगायतका दश प्रकारका आपाङ्गता भएका व्यतिmहरुलाई उनीहरुको स्वास्थ्य परिक्षणका आधारका स्तरको वर्गीकरण गरिने व्यवस्था छ ।