सूचना तथा समाचार

ललितपुर उप-महानगरपालिकाको २५ औँ नगरपरिषदबाट पारित बजेट,नीति तथा कार्यक्रम बारे प्रेस विज्ञप्ती
मितिः २०७३/०९/२८
ललितपुर उपमहानगरपालिकाको २५ औँ नगरपरिषदको बजेट, नीति तथा कार्यक्रमको सार्वजनिकिकरण कार्यक्रम आज मिति २०७३/९/२८ गते उप-महानगरपालिकाको कार्यालय परिसर पुल्चोकमा प्रमुख तथा कार्यकारी अधिकृत श्री भरत मणी पाण्डेज्यूको अध्यक्षतामा  र संघीय मामिला तथा स्थानीय विकास मन्त्रालयका मन्त्री माननीय हितराज पाण्डेज्यूको प्रमुख आतिथ्यमा सम्पन्न भएको छ । उक्त कार्यक्रममा माननीय सांसदहरु, राजनीतिक दलका प्रतिनिधिहरु, पूर्व नगर प्रमुख, उपप्रमुख लगायत नगरका विभिन्न संघसंस्था, नगरवासी, पत्रकारहरु र कर्मचारीहरुको बाक्लो उपस्थितिमा प्रमुख तथा कार्यकारी अधिकृत श्री भरत मणी पाण्डेज्यूले आ.व. ०७४/०७५ का लागि रु. १ अर्ब २० करोड ९३ लाख २३ हजारको बजेट सार्वजनिकिकरण गर्नुभयो र चालु आ.व. ०७३/०७४ को लागि विनियोजित बजेट रु ९० करोड रहेको छ जस अनुसार चालु आ.व. को तुलनामा आ.व.०७४/०७५ को बजेट प्रस्ताव ३५% ले बृद्धि भएको छ ।
आ.व. ०७४/०७५ मा स्वीकृत बजेट, नीति तथा कार्यक्रमको सफल कार्यान्वयनका लागि महत्वपूर्ण नीतिहरु र प्राथमिकताका क्षेत्रहरु निर्धारण गरिएका छन् । सार्वजनिक सेवा प्रवाहमा सुधार, वैकल्पिक उर्जामा लगानी, संस्कृति सम्पदा संरक्षण र पुन निर्माणमा जोड, वातावरण मैत्री स्थानीय शासन एवं पूर्ण सरसफाई अभियान, बालमैत्री स्थानीय शासन व्यवस्था उन्मुख, सामाजिक समावेशी विकासमा जोड दिन बजेटको प्राथमिकताका क्षेत्रहरु छन् । त्यसै गरी नगर यातायात गुरुयोजनाका आधरमा सडक निर्माण गर्ने, शहरी हरियाली प्रवर्द्धन गर्न निजी क्षत्रसँग सहकारी गर्ने, कुपन्डोल-जाउलाखेल-लगनखेल सडकलाई सफाई, हरियाली,सोलार बत्ती,अपाङ्ग मैत्रीको दृष्टिबाट नमुना सडक निर्माण गर्ने, पर्यटकलाई सुविधा दिन पुल्चोक मंगलबजार विद्युतीय सवारी संचालन गर्ने र मंगलबजारको शौचालय पुन निर्माण गरी सुविधा सम्पन्न गराउने, होमस्टेलाई प्रवर्द्धन गर्ने, प्रत्येक टोल सफाई अभियान र पुरस्कारको व्यवस्था गर्ने नीतिहरु लिईएको छ । भूकम्प पीडितलाई नक्सा पास गर्दा लाग्ने सम्पूर्ण दस्तुर मिनाह गरिएको छ । उप-महानगरपालिकाको भवन र क्रमश वडा कार्यालयहरुलाई Free WiFi zone बनाईने छ । ३० वटै वडामा महिला शशक्तिकरण समूह गठन गरी सीप विकास गरिने, एकल महिला, जेष्ठ नागरिकहरुको सूरक्षा, सम्मान, युवाहरुलाई स्वःरोजगारमा प्रेरित गर्न नीतिहरु अबलम्बन गरिएका छन् । त्यसै गरी जन स्वास्थ्य, विपद व्यवस्थापन, सुशासन प्रवर्द्धन, सार्वजनिक निजी साझेदारी, राजश्व प्रशासन सम्बन्धि विभिन्न नीतिहरु अबलम्बन गरिएका छन् ।
कूल १ अर्ब २० करोड ९३ लाख २३ हजार बजेट बाडफाँड यस प्रकार छ । आय तर्फः नेपाल सरकारबाट प्राप्त हुने रु ५५ करोड ७५ लाख २३ हजार, आन्तरिक स्रोतबाट ३७ करोड १८ लाख, राजश्व बाडफाँड रु ३ करोड, वैदेशिक स्रोत रु १२ करोड ५० लाख सहभागिता र मौज्दात रु ७ करोड ५० लाख । व्यय तर्फः प्रशासन खर्च १६ करोड ५० लाख , फोहोर मैला व्यवस्थापन रु १० करोड, पूर्वाधार विकास तथा सडक निर्माणमा रु ४५ करोड २५ लाख, सम्पदा संरक्षणमा २ करोड ५० लाख, खानेपानी सुधारमा रु ५५ लाख, फोहार मैला आयोजक (World Bank) रु ४ करोड ५० लाख रहेको छ ।
उल्लेखित बजेट, नीति र कार्यक्रममा सम्पूर्ण नगर वासीहरुको सहभागिता, सहयोग र सहकार्य रहने र अन्य सबै सरोकारवालाहरुबाट सकारात्मक सहयोग प्राप्त भै ललितपुर नगरलाई स्वच्छ, सफा, साँस्कृतिक र पर्यटकीय नगर निर्माण गर्ने कार्य अगाडि बढ्ने विश्वास लिईएको छ ।

रुद्र गौतम
वरिष्ठ इन्जिनियर तथा प्रवक्ता

Upload Date:
२०७३।१०।३

ललितपुर उपमहानगरपालिकाको आर्थिक बर्ष २०७४/०७५ का लागि बार्षिक योजना पारित गर्नको लागि निम्‍न मिति, स्थान र समयमा नगर परिषदको बैठक आयोजना गरिने भएकाले सम्बद्ध सरोकारवाला सबैको जानकारी तथा उपस्थितिको लागि सूचित गरिन्छ ।

मितिः २०७३ पौष २८ गते बिहिबार
समयः दिउँसो ११:३० बजे
स्थानः ललितपुर उप-महानगरपालिका कार्यालयको प्राङ्गण

Upload Date:
२०७३।९।२२

प्रेस विज्ञप्ती - ९८ औं स्थापना दिवस

प्रेश विज्ञप्‍ती

यस ललितपुर उप-महानगरपालिकाको ९८औं स्थापना दिवस आज मिति २०७३ पौष २ गते शनिबार बिभिन्‍न कार्यक्रमहरु संचालन गरी सम्पन्‍न भएको छ । बिहान ७:०० बजे करिब १५० भन्दा बढी सहभागीहरुले साईकल र्‍यालीमा भाग लिई डेढ घण्टाको साईकल यात्रा पुल्चोक - जावलाखेल - लगनखेल - टंगल - सुन्धारा – मंगलबजार - दरबार स्क्वार – क्वाल्खु - प्रभात स्कूल - पाटन ढोका - कृष्ण गल्ली हुँदै पुल्चोक नगरपालिका भवन रुटमा सम्पन्‍न भयो । उक्त साईकल र्‍यालीमा माननीयहरु, राजनैतिक दलका प्रतिनिधिहरु, जिल्ला प्रहरी प्रमुख, स्थानीय विकास मन्त्रालयका सहसचिव, ललितपुर उप-महानगरपालिकाका प्रमुख तथा कार्यकारी अधिकृत, वरिष्‍ठ अधिकृतहरु लगायत कर्मचारीहरु र पत्रकारहरुको सक्रिय सहभागिता रहेको थियो ।

ललितपुर उपमहानगरपालिकाको प्राङ्गणमा आयोजित औपचारिक कार्यक्रम बिहान ११:३० बजे प्रमुख तथा कार्यकारी अधिकृत भरत मणी पाण्डेको अध्यक्षतामा प्रारम्भ भई बिभिन्‍न सूचना प्रविधि सम्बन्धी सेवा प्रवाहका विद्युतीय एप्लिकेशनहरुको औपचारिक समुद्‍घाटन प्रमुख अतिथि माननीय सांसद मदन बहादुर अमात्यज्यूबाट गरियो । जसमध्ये नक्सा पास प्रकृयामा विद्युतीय प्रणाली (Electronic Building Permit System – e-BPS) को प्रमुख अतिथिबाट उदघाटन गरी नमूनाको रुपमा नक्सा पासको प्रमाणपत्र तत्काल प्रिन्ट गरी वितरण गर्नुभयो । अब उपरान्त नक्सा पास प्रकृयामा विद्युती प्रणालीलाई प्रभावकारी ढंगले कार्यान्वयन गर्दै लैजाने प्रतिबद्धता समेत प्रमुख तथा कार्यकारी अधिकृत भरत मणी पाण्डेज्यूले व्यक्त गर्नुभयो । उक्त e-BPS कार्यक्रमको लागि UNDP (CDRMP) बाट प्रविधिक सहयोग प्राप्त भएको हो । सो विद्युती प्रणालीको वेबसाइट – www.lsmcebps.gov.np रहेको छ ।

त्यसैगरी आजका मिति देखि "हाम्रो ललितपुर" नामक मोवाइल एपको आधिकारिक उद्‍घाटन समेत भयो । यस एप भित्र सफा ललितपुर, सुचना तथा समाचार, सार्वजनिक खरिद बोलपत्र सूचना, नागरिक बडापत्र, e-BPS, व्यक्तिगत घटना दर्ता, सामाजिक सुरक्षा भत्ता, कर तथा शुल्क, नगर प्रहरी र आकस्मिक सेवा सम्बन्धी खण्ड रहेका छन् । सम्बन्धित नगरवसीले आफ्नो सेवा सम्बन्धी गुनासोहरु पनि उक्त एपबाट गर्न सकिने व्यवस्था छ । यस एप निर्माणको लागि यूरोपियन यूनियन (फोहोरमैला ब्यवस्थापनमा अभ्यास सुधार परियोजना) को सहयोग रहेको छ । यस एपको उपयोग गर्न सम्पूर्ण नगरवासीहरुमा अनुरोध गरिन्छ ।

उल्लेखित विद्युतीय प्रणालीले समयानुकुल सूचना प्रविधिको उपयोग गरी सेवाग्राहिहरुले सुसूचित हुने, घरमै बसेर कामको अवस्था बुझ्‍न सकिने र गुनासो समेत गर्न मिल्ने व्यवस्थाले सेवा प्रवाहमा थप प्रभावकारिता बढ्ने विश्‍वास लिइएको छ ।

ललितपुर उप-महानगरपालिकाको ९८औं स्थापना दिवसको औपचारिक कार्यक्रममा निरन्तर २५ बर्ष सेवा गरेका कर्मचारीहरु र यसै बर्ष ५८ बर्ष उमेर हदबाट अनिवार्य अवकास भएका कर्मचारीहरुलाई सम्मान गरिएको थियो ।

आजको यस कार्यक्रममा उपस्थित भई साईकल र्‍यालीमा सहभागी हुने महानुभावहरु, औपचारिका कार्यक्रममा हाम्रो निमन्त्रणा स्वीकार गरी सहभागी हुनु भएका प्रमुख अतिथि लगायत अन्य अतिथिहरु एवं समपूर्ण उपस्थित महानुभावहरु, पत्रकारहरु र प्राविधिक सहयोग जुटाउने संघ संस्थाहरु र सम्पूर्ण कर्मचारीहरुलाई ललितपुर उप-महानगरपालिका हार्दिक धन्यवाद व्यक्त गर्दछ ।

 

रुद्र गौतम

वरिष्‍ठ ईन्जिनियर / प्रवक्ता

Upload Date:
२०७३।९।२

Pages